ازاي تنقل كومبيوترات كتير من Wordgroup to domain و انت قاعد في مكتبك

ازاي تنقل كومبيوترات كتير من Wordgroup to domain و انت قاعد في مكتبك

لاحظت على اكتر من جروب و حتى في سؤال السكريبتنج بتاع امبارح انه في ناس بتسأل عن ازاي تنقل الكومبيوترات في شركتها من وركجروب لدومين ، فقولت بقا مبدهاش ، ننزل البحر و نملى القلل

========
في هذا الموضوع:

  • اربع سيناريوهات تختار منها ما يناسبك
  • لو شركتك وركجروب و عايز تنقل دومين ، ايه الادوات المتاحة
  • ادوات مجانية و سهلى تستعمل في اكتر من سيناريو
  • ماذا بعد الميجريشن

=======
علشان نطرح الموضوع بشكل مبسط ، حنعمل اكتر من سيناريو من السهل البسيط للمعقد جدا ، و انت عليك تشوف انت عايز ايه و تختار السيناريو المناسب ليك

اول حاجة لازم تبقا عارف انه علشان تعمل كده

Remotely

لازم تبقا عارف اليوزر نيم و الباسوورد بتوع اللوكال ادمين ، لو مش معاك ، يبقا تركب الحلزونة و تلف على كل كيمبيوطر ، او تروح لسيناريوهات معقدة شوية (الثالث و الرابع)

++++++++++++++

السيناريو الاول: مش مهم الداتا بتاعت اليوزر ، و مش عايزين ننزل ويندور من اول و جديد

في السيناريو ده ، بالنسبة ليك مش مهم الداتا بتاعت اليوزر ، اما انها على بارتيشن تاني ، او على فايل سيرفر ، المهم انت عايز تروج دومين ببروفايل جديد ، ايه المتاح

ممكن تستعمل اداة مشهور جدا و محدش مديها اي اهتمام الا و هي

PSEXEC

 و هي اداة مجانية تتيح ليك تنفيذ اوامر عن بعد على كومبيوتر او مجموعة كومبيوترات ، الفكرة كمان انه ممكن تستعملها علشان تنفذ برنامج تاني محطوط على فايل شير او غيره ، هي اداة ممتازة جدا

في طريقة سهلة و جميلة مشروحة هنا

https://dirteam.com/tomek/2007/01/08/how-to-remove_5c00_add-workstation-from_5c00_to-domain-remotely_3f00_/

و ممكن تدعبس براحتك بقا ازاي تقرا ملف تيكست فيه اسامي الكومبيوترات علشان تنفذ الاوامر عليهم

+++++++++++++++

السيناريو التاني: عايزين تحتفظ ببروفايل اليوزر ، مش عايزين ننزل ويندوز من اول و جديد

السيناريو ده من اكتر السيناريوهات شيوعا و مفيش طريقة سهلة و مباشرة ، لو عايز تركب الحلزونة ممكن تستعمل اداة شبه مجانية اسمها

Profwiz

الاداة دي ممكن تشتريها ب 100 دولار ، و ده شئ صحي على فكرة لو حتستعملها كتير او انت كونسالتانت ، لانه اما بتشتريها ، تقدر تعمل الميجريشن ريموتلي من الكوماند لاين بتاعها

لو مش عايز تدفع ، ممكن تستعمل حاجة زي ال

User State Migration tool

مع

PSEXEC

ممكن تشوف هنا

http://www.utilizewindows.com/pc-fundamentals/basics/108-migrating-user-profiles-and-data-to-new-windows-installation

+++++++++++++

السيناريو التالت : حنزل ويندوز من اول و جديد بس مش عايزين نحتاس

هنا انا مستغرب جدا انه في ناس كتير متعرفشي

Microsoft Deployment Tool Kit

و هي اداة سوووبر و مجانية تماما من مايكروسوفت تتيح ليك عمل

Image

من الويندوز بكل اعداداتها و بعدين ممكن تظبطها اما بسي دي او بال WDS علشان تحمل الويندوز على المستخدمين ، طبعا ممكن تدمجها مع ال

User State Migration

و تعمل سكريبتات معقدة جدا لو انت حابب ، ممكن تحمل الاداة من هنا

https://www.microsoft.com/en-us/download/details.aspx?id=40796

و Train Signal عندها تريننج طويل عريض ازاي تقدر تستعملها

+++++++++++++

السيناريو الرابع: احنا قلوسنا كتير ، و عايزين نستعمل ال SCCM

طبعا مش عيب ، و ممكن تدمج ال

SCCM + MDT

علشان تعمل

Zero Touch Deployment

و بروفايل ميجريشن زي ما انت عايز ، الطريقة مشروحة في 300 فيلم قبل كده ، دعبس بس شوية على الانترنت ، و المزج ده بيتيح ليك عمل سيناريوهات معقدة و الانتقال حتى من هاردوير جديد لقديم

+++++++++++++

ماذا بعد الميجريشن

حقيقة انا جربت الطرق دي كلها ، و بعد استعمالهم و الخبرة فيهم ، قدرت اوصل لنسبة نجاح اعتقد 97 الى 98 في المية ، و النسبة المتبقية بتكون نتيجة لعيوب الويندوز ، فالموضوع بيكون سهل ، بس هناك بعض العقبات اللي مش حتعرف تتغلب عليها بسهولة منها

  • الطابعات و اعادة وصلها و ال mapping بسهولة و حذف القديمة
  • لو في فايل سيرفر و معمول ليه شورت كت
  • اعدادات الاوفيس و الاوتلوك
  • لو عندك بروفايلات اوتلوك مش اكستشينج
  • ازاي حتبعت الباسوورد لليوزر

عارف انها حاجات لوجستية مش مباشرة بس مهمة ، و اقترح انه تبتدي تفكر فيها قبل ما تنزل ترعة الميجريشن ، و تجرب على شوية يوزرز الاول اللى حتعمله ، علشان غالبا بيكون في ملف اكسيل حجمه 10 كيلو بايت بيطير و مش حتعرف ترجعه ، و الملف ده بقا بالذات بيكون عليه كل اسرار الشركة

افكار اخرى ؟!

Leave a Reply

%d bloggers like this: