كيف تحدد قيمة الشركة لو حتدخل شريك – انها العلبة اللي فيها فيل !!!
اسبوع جديد ، نشاط ، حيوية ، هوب هوب
امبارح جالي سؤال فيري انترستنج الحقيقة ، واحدة من الاسئلة اللي تخليك تتعدل في قعدتك و تنتبه ، انا شيلت شوية تفاصيل علشان الخصوصية ، بس يمكنك ان تفهم الموضوع حتى بدون التفاصيل
==========
صباح الخير
حضرتم انا شغال في شركة و صاحب الشركة بعد فترة من العمل معاه عرض عليا انه اخش بقيمة 25% من قيمة الشركة ، هو قاللي انه قيمة الشركة تساوي
XXXXXX
و انا سعيد بالخطوة بس ازاي اعرف قيمة الشركة و اعرف قيمة الفلوس دي
==========
طيب ، اولا احب انوه انه ده مش مجال خبرتي او عملي ، و اساسا تقييم الشركات و مراجعتها ده عالم و علم بحاله ، و كنت باخد كورس فيه من سنة و عرفت بعدين انه الموضوع ده اساسا من المواضيع المتقدمة جدا و تدرس في الدكتوراة بالتفصيل ، بس انا ححاول من خبرتي و قراءاتي انه امدك بكام نقطة ، مش حيغطوا كل الابعاد بس حيغطوا قول 50 في المية اللي تقدر تنورلك كام لمبة و تحدد الخطوة الجاية…
اولا انت عندك رقمين لازم تبص عليهم ، الاول قيمة الشركة ، ثانيا قيمة استثمارك ، خلينا نفترض انه اتقالك انه قيمة الشركة هي 100 الف جنيه ، و بالتالي انت حتستثمر و تصبح شريك مقابل ضخ ل 25 الف جنيه في الشركة دي ، و هنا خلينا نبص للرقمين دول
اولا مين اللي بيحدد انه قيمة الشركة 100 الف جنيه ، اللي بيحددها هو قيمة الممتلكات اللي بتمكلها الشركة دي من مواد مادية و معنوية يعني مثلا (الشركة تمتلك مكتب (مش مأجراه) تمتلك هاردوير) ده ماديا او معنويا مثلا في حالتك شركة برمجة فانت تمتلك سوفتوير ، لو حنبيع السورس كود ده يتباع بحق ربنا و يجيب كام (لا يعتبر الموظفين ممتلكات)
البعد التاني في كده هو الارباح و القيمة المستقبلية للشركة ، و هنا في كذا مفهوم محاسبي لازم تعرفهم ، بس بالبلدي كده ، الشركة ممكن تكون مش محققة ارباح نتيجة مثلا لتسديد ديون او اقساط مستحقة السنة الماضية ، بس الديون دي انتهت و مع نفس قيمة العمل و العوائد الشركة حتحقق ارباح السنة القادمة.
ممكن برضوا الشركة بتخسر بس مضت عقد لمدة خمس سنين و لسه العوائد المادية بتاعته مدخلتشي الحسابات و متعكستشي في قيد الشركة ، يعني لازم تفهم مداخل الشركة و تاريخ و مستقبل الشركة المادي ، و علشان كده لازم تطلب ال
Financial statement
بتاعت الشركة و يفضل ل 3 سنوات ماضية علشان تفهم تاريخ و مستقبل الشركة بالظبط
البعد التاني هو قيمة استثمارك ، يعني انت حتستثمر قيمة 25 الف جنيه ، هنا في عاملين لازم تبصلهم
Future value of money
يعني لو معملتش استثمار للفلوس دي و حطيتها في البنك و جابتلك فوائد 10% (بغض النظر حلال و لا حرام) و لو حطيت الفلوس دي في الشركة حتجيبلك عائد اد ايه ، الفكرة انه الناس كلها بتقيس بفوائد البنك لانها المضمونة و بالتالي اقتصاديا ، الكل بيقولك انه اي استثمار تعمله لازم يجيبلك على الاقل 10% او ما يوازي قيمة استثمارك في البنك ، طب لو حطيت الفلوس في البيت ، اوكي طبعا بس هنا قيمة الفلوس بتقل لانه في حاجة اسمها تضخم
http://en.wikipedia.org/wiki/Inflation
طيب البعد التاني هو ال
Economic profit
يعني ايه ، يعني في ربح حسابي
Accounting profit
و ده اللي بيطلع من وارد و داخل الشركة ، بس في عائد اقتصادي ، يعني ايه ، و ايه الفرق
يعني انت مثلك ممكن يكون قودامك استثمار في شركة تانية بنفس قيمة الفلوس ، بس الاستثمار ده حيجيبلك 25% عائد مقارنة ب 20% عائد (بغض النظر عن انه الشركة بتخسر او بتكسب لانه ده ملوش علاقة بالعائد العائد عليك) و بالتالي حيكون الاستثمار ده فاشل (في الشركة ذات العائد الاقل) ، ممكن برضو تقول لو سبت الشركة دي و حطيت الفلوس في البنك و روحت شركة اكبر ، حاخد مرتب اعلى و محافظ على فلوسي (عائد مادي اكبر) بس على المدى الطويل هل في مستقبل للشركة دي و هنا يأتي دور تحليل مستقبل الشركة و نوع المنتجات اللي بتنتجها و ال
Roadmap of future and current products
And
Lifecycle of current products
عارف الموضوع طلع تخين و محتاج تحليل عميق ، و لسه الموضوع محتاج منك قراءة اعمق و اكبر ، بس اتمنى انه اكون نورت كام لمبة