الاسباب الحقيقية ليه بتوع الاتشر ار و الريكروترز بيزحلقوك باسباب مايعة – الجزء الاول – ايتها السماء ، صبي لعنتك على الريكروترز

الاسباب الحقيقية ليه بتوع الاتشر ار و الريكروترز بيزحلقوك باسباب مايعة – الجزء الاول – ايتها السماء ، صبي لعنتك على الريكروترز

=============================
اهداء خاص لمحمود سعيد ، سبحان الله كنا بنتكلم امبارح و اقترح اعمل بوست على موضوع الريكروترز اللي مش بيعرفوا يقيموا الكانديدات صح ، قولتله صبحان الله اكنك قريت موضوع بكرة

=============================

الموضوع حيطول ، حيبتدي في ناحية و حنروح لناحية تانية

لو تفتكرو كنت حطيت من شهر موضوع هنا بيتكلم عن السن و انه في ناس ببترفض في الانترفيوهات علشان سنها ، الموضوع هنا https://www.facebook.com/M.Magdy.soliman/photos/a.621438011282357.1073741829.617912228301602/644231909002967/?type=1

و بعدها جه رد من واحد من الفنانيز و طلب انه انشر قصته ، قصته و هنا و ليا رد في الاخر

====================================================

كنت عاوز ابعت مسيج للبشمهندس اللى دخل انترفيو فودافون وعندة 33 سنة ومااتوفقش وماتمش اختيارة ان اوعى تيأس او حتى تفكر تغير او تعمل شيفت للكارير بتاعك بالعكس بقة استمر وخد اكسبرينس على قد ماتقدر وفى فيلدز على قد ماتقدر كمان وكنت عاوز اقولة عن تجربتى مع نفس الانترفيو معاهم

 : انا عندى 27 سنة اوعى تزعل مطلقا ان انتا مانجحتش لأن ولا عشان سن ولا ايفن اكسبرينس فودافون بتقيم بيها الناس لأن القصة كلها فى فودافون وعن تجربة مريت بيها معاهم بيبقة عندهم بلك وجروب من الناس عاوزة تترقى وغالبا بيبقة ناس فى السبورت او تيمز زى الهيلب ديسك او الكستمور سيرفس اوكى فا رولز الشركة بتحتم علية انة يعمل كومبتشن بين ناس من برا وناس من جوا

بس طبعا البريفيرد جدا ناس من جوا والا الناس اللى جوا هايسيبوه ويمشوا زى مابيحصل في شركات تانية المهم عشان ماطولش عليك انا اتقدمت مرتين لنفس البوزيشن بتاعك مرة كنت مقبول HR وصعقت صعقة التنين الحزين لما اتقالى انة انا اترفضت تيكنكال لدرجة جابتلى اكتئاب شهر ومرة تانية كنت مقبول تيكنيكال وماكنش فية غلطة فى اجاباتى بالعكس وقال اية ياسيدى اترفضت HR مع ان نفس الانترفيو ونفس الاجابات

 بس ماكنش نفس الشخص الحقيقة ساعتها ايقنت ان ربنا مش عاوزلى المكان دة والحمد لله قبلت فى مكان تانى افضل بكتير برا مصر باكسبرينس بالنسبالى هاتضيفلى كتير وصدقنى اتكلمت كذا مرة مع ناس هناك وشوفت الناس اللى نجحت هناك ومااعتقدتش مطلقا ان هما احسن منى او منك فى حاجة بس دة نصيب فى الاول او فى الاخر

حاجة تانية: انا شغال سيستم سنتر بقالى اكتر من اربع سنين المهم عشان ماطولش عليك يعنى جالى فيد باك من ميكروسوفت انهم عاوزين سينيور بس سيستم سنتر سبورت المهم يعنى قدمت وكدة اترفضت فى ميل من غير حتى مااعمل انترفيو مع ان موجود فى السي فى بتاعى كام سنة اكسبرينس وعلى اية وفى اية وكمان اتبعتلى واتقالى انهم عاوزين واحد اكسبرينس مش اقل من 10 سنين عشان يبقة سينيور

وقلتلهم ساعتها طب ممكن لو ينفع يبقة سبورت من غير سينيور مارضيوش المهم بقة يا معلم اتفاجئ وانا فاتح لينكد ان ان واحد ما كان شغال فى شركة مالتى انترناشونال تانية وخبرتة اقل من ناحية السيى فى اللى حاطة فى عدد السنين يعنى ( اللى هوا المعيار اللى انا اترفضت بية )واتقبل فى البوزيشن دة

وكان نفسى حتى اعمل انترفيو او اثبتلهم انا اية ومكانى اية بس هو نقطة اخيرة فى الفيلد بتاعنا دة المعرفة مش هاقول الواسطة بس المعرفة بتفرق اوى وخاصة في الشركات المالتى انترناشونال دى وحتى لو كنت كويس اوى وجامد اوى اوى بس هي دى مصر يا عبلة سواء قطاع حكومي او خاص وكمان حاجة صدقنى فودافون لنفس البوزيشن دة كبكيج وسلارى او اكسبرينس ماكنتش هاتضيف لحد زى او زيك كتير بالعكس ودة نصيب فى الاول وفى الاخر واحمد ربنا انها مجاتش

====================================================
ردي بقا:

اولا طبعا انا معرفتي بالنظام جوا فودافون ازاي فانا مقدرشي احكم على الموضوع بس انا نشرت القصة زي  ما هي ، و ده مش تشكيك في الكلام بس علشان واحد ميجيش يقوللي انت بتنشر حاجات غلط

ثانيا و ده الاهم:

لو الريكروتر و هو بيكلمك في السكريننج كول : سنك كبير ، او سنك صغير ، خبرتك مش حتمشي مع البوزيشن ده ، احنا بندور على واحد بمهارات تانية ، مقاس رجلك مش كبير ، الكواكب مش متعامدة بشكل كفاية مع القمر علشان نكمل معاك الانترفيو او اي حاجة مايعة كده ، ده كناية انك و انت بتتكلم عملت/قولت غلطة (ما) و الغلطة دي ولعت لمبة حمرا مع الريكروتر و خلته يرفضك.

ده حقيقة لو انت لسه في اول المراحل و بتعمل اول انترفيو عالتيليفون و الانترفيو مش تيكنيكال.

كتير حصل معاهم كده و اشتكولي و بتحليل الموضوع وصلت بنسبة 99% من الحالات انه في غلطة اتعملت مثل ضعف اللغة الانجليزي ، ضعف التركيز ، التوتر او الخوف ، ضعف مهارات الاتصال او البريزنتيشن سكيلز

لو حصل ده معاك في السكريننج كول ، تجاهل تماما اي سبب اتقالك و خش في المفيد ، اسأل سؤال مباشر للي بيكلمك ، قولله حضرتك انا حاسس انه مش ده السبب الرئيسي ، و حاسس انه في غلطة ما انا عملتها ، تقدر تقوللي ايه هي  (طبعا ممكن تستعمل اي نسخة تانية تألفها انت) و اوعا تخليه يقفل الخط ، في 99% في المية من الحالات و بسبب المفاجئة حتعرف السبب و ده حيكون سبب في تطورك ، او انه حتقدر تصحح الغلطة اون زي سبوت و تكمل.

في الجزء الثاني حنتكلم عن ازاي تخترق انظمة الريكروتنج و اشرحلك العملية ( في صورة عامة) بتمشي ازاي

اكبر خطأ في السي في – اراهنك لو فتحتها حتلاقيك كاتب انا بجيب اللبن من البقرة ن و بعمل الكباب من اللحمة

اكبر خطأ في السي في – اراهنك لو فتحتها حتلاقيك كاتب انا بجيب اللبن من البقرة ن و بعمل الكباب من اللحمة

صباح الخير

اليومين اللي فاتو راجعت بتاع 7 او 8 سيفيهات ، في ناس كتير من المجموعة دي طلبت انه منشرشي تعليقي على سيفيهاتهم مع اني عمري ما نشرت اسم او سي في ، بس انا بطلب من الناس انها تسمح بمشاركة الملاحظات مع الاحتفاظ بالخصوصية و السرية علشان الناس تستفيد…

طيب ، بعد مراجعة الاف السيفيهات على مدار العشر سنين اللي فاتوا ، و العشرات الفترة اللي فاتت ، اكتشفت اكبر خطأ الكل بيعمله بلا استثناء في كتابة السيفيهات او السير الذاتية ، حتى الشركات المحترفة بتقع في الخطأ ده …الناس بتكتب انا بجيب اللبن من البقرة ، بعمل الكباب من اللحمة ، بعمل الشيكولاتة من الكاكاو

مش مصدقني انت…طيب افتح السي في بتاعتك ، اه افتح بس ربنا يكرمك ، هات الحتة بتاع التكنكال سيكلز ، اقرا كده ، اهو اديك كاتب انا بجيب اللبن من البقرة…

ايه…. مش مكتوبة…شكلك مش حافظ السي في بتاعتك..طيب نقرا تاني

حضرتك كاتب

Installing and implementing Exchange Server 2010

انا بقا شخصيا اما بقرا حاجة زي كده بقول حاجتين: ياختي او اسم الله عليك…

اسف بس فعلا ده اللي بيحصل..

شوف يا سيدي ، ركز معايا، شوف اعلان جهينة او اي شركة بتاعت لبن ، بيقولوا ايه ، لبنا اعلى كالسيوم ، افنتخ افنتخون ، افلشح افلحون ، مهو لبن و جاي من البقرة و ممكن يتقال كده بس محدش بيقول كده ، الكل بيقول مميزات اللبن بتاعه محنا عارفين انه اللبن ده جاي من البقرة ، اللي بعده اديني المفيد

شوف اعلان الحسن و الحسين ، مهي لحمة و كباب و كفتة في الاخر ، بس يحسسك انه البرجر بتاعهم ده معمول في تكساس و البقرة دي بقرة مريخية و مش موجودة على كوكبنا اساسا , افنتخ افنتخون ، افسك افسكون

انت بقا حضرتك روحت عامل ايه في السي في، روحت قايل بقا انا بجيب اللبن من البقرة و بعمل الكباب من اللحمة

فين يا سيدي المميز ، ايه الجديد ، ايه اللي بتعرفوا يميزك عن غيرك ، في مليون واحد بيعرف اكستشينج ، بس انت ايه يميزك عنهم ، لو كاتب مشاريع ، كانت معقدة اد ايه ، ايه دورك ، بكام الف او مليون لحلوح  مينفعشي تكتب

Installing Active Directory at customer X

بنتي كمان سنتين حتعرف تنزل اكتيف دايركتوري ، انت بقا كذلك المحترف المميز اللي شايف نفسك خطير ، سبت كل فرصة ممكنه و روحت قايل انا بجيب اللبن من البقرة

ما ابدعك ، ما اروعك

افتح يا حج السي في ، ابوس ايدك حط التيكنكيال سكيلز مش معترض ، بس بعبر عن نفسك ، حط اعلانك ، ميز نفسك ، و لو لقيت نفسك عادي مش مميز ، يبقا انت على اول طريق النجاح و فكر ازاي تبقا مميز

اوفر اند اوت