الفيندورز، و الكاستمرز و البريسيلز… هما مين دوول

صباح الخير…
استكمالا لموضوع امبارح، في كذا سؤال ورد منهم واحد من اخ عزيز، تلاسئلة بتدور في مدار يعني ايه فيندور و مين هو الكاستمر، انا اخترت تلسؤتل الاكثر شمولا مع شكر كل من سأل، نشوف السؤال
#####
السلام عليكم ياحودة احييك على المقال الخاص بالقواعد السبع للتعامل مع العملاء ولكن ممكن تبقة تعرفنا فى مقال الدنيا من البداية شكلها اية يعنى اية هوة الفيندور واية هوة البارتنر وية شكل العملاء وامثلة بالاسماء مثلا لكل نوع منهم واية هوة البرى سيلز وهل هوة راجل بتاع سيلز ولا راجل تيكنيكال وازاى ابقة برىسيلز وانا لما ابقة بريىسيلز هبقة بتعامل مع مين مع عملاء ولا بارتنر ولا فيندور وكمان هل البرىسيلز دة هوة الى بيبع المنتج للعملاء ولا دة الى بيننفذة من الناحية التيكنيكال بعد الناس السيلز ميبيعوا للعميل ويتفقوا معاة يجى دور البريسيلز فى التنفيذ.. وسامحنى لو كان السؤال يبدوا أحمق ولكن يختلط على الامر فى هذا الموضوع وهل الناس الى ميكروسوفت بتجيبهم يشرحوا الجديد فى منتج زى شروحاتك فى ميكروسوفت هما دول البرىسيلز علما انك مكنتش بتشتغل فى ميكروسوفت وقتها .. اعلم ان سؤالى غير منظم ولكن هذا لاختلاط الامر على بشدة واحتاج لتوضيح الامر من بدايتة
####
خلينا نشوف كده، حجواب بهدوء و لو في لخبطة يا ريت تسألوا

الفيندور، هو اي شركة مصنعة، بس في السياق بتاعنا هو الشركة الرئيسية زي مايكروسوفت و اتش بي و غيره،بس بالنسبة للعميل (الكاستمر) ، كلهم مصنعين، يعني شركة زي فودافون، مايكروسوفت و شركة زي لينك، هم مزودي خدمة ليها…

العميل هو اي شركة بتشتري مننا (مننا اعني احنا كفيندور او بارتنر)

بارتنر، يطلع ايه ده كمان، بص يا سيدي، كل الشركات بتعتمد على ال
ecosystem
علشان تقدر تعيش، يعني مفيش شركة تصنع و تبيع و توردد و تركب و تنفذ و تدير، كل شركة من الفيندورز قاللك احنا نصنع، و ندي مهمة التنفيذ و البيع المباشر و الغير مباشر لبارتنرز زي او ام اس، ابتك، اكت و غيرهم.. و كل شركة علشان تاخد البارتنرشيب بيبقا لازم تدفع فلوس و تحقق اهداف و موظفيها ياخدوا شهادات معينة و هكذا…

طيب، نيجي بقا لحتة البريسيلز (انا حتكلم من وجهة نظر مايكروسوفت و ان كان في اختلافات بسيطة مع الباقيين بس كله في نفس الفلك)
مايكروسوفت بتقسم العملاء افقيا و عموديا لقطاعات و مستويات، يعني في عملاء صغيرين و عملاء انتربرايز (الانتربرايز هو اللي بيمضي انتربرايز اجريمنت مع مايكروسوفت يعني عنده على الاقل ٣٠٠ كلاينت)

و في بقا تقسيم حسب القطاع يعني حكومي  ، خاص، اتصالات، و هكذا…

الدايرة بتبتدي من الاكاونت مانجر، اللي هو بيدير حساب العميل، مهمته تحقيق البيع مع العميل و التحقق من رغبته في الشراء و غيره، يعني سيلز…

في بقا ناس اسمهم
technology strategists
و دول مهمتهم اخد صورة واسعة للعميل و وضع خطط لتنفيذ تقنيات مايكروسوفت جوا الاكاونت سواء اشتراها العميل او مشتراهاش (بس بيهتم انه التكنولوجيا المشتراه تتنفذ) و دول بيبقوا معينين للعميل

في بقا ناس
technology sales professionals

و دي ناس مش مهتمة بعميل واحد ، بل مهتمة باي عميل مهتم بكتنولوجيا معينة، و هم دول البريسيلز و دول خلفيتهم تيكنيكال ، و بيعملوا بريزنتيشن او بايلوت او بي او سي علشان يبرزوا محاسن التكنولوجيا (اترك لك البحث في الفرق بين البايلوت و البي او سي)

و في ناس كمان زييهم بس اسمهم
solutions sales professional
و ده بيبقا مهتم بتكنولوجيا معينة بس من ناحية السيلز…

كل اللي فوق دول دورهم متداخل و بيلعبوا كورة ، يعني مثلا ممكن عميل يكلم اكاونت مانجر علشان تفنية فيدوره يستعين بحد بريسيلز تيكنيكال و غير تيكنيكال علشان يبيع التقنية، و بيرجع للراجل الاستراتيجيست عزشان يتاكد انه الطريق للتكنولوجيا دي مش حيتداخل مع حاجة.كاري تنفيذها… و غيره

طب فين يا عم البارتنر
البارتنر هنا ممكن يعمل بريسيلز بدوره، او يساعد التي اس بي او الاس اس بي انهم يعملوا بايلوت او بي او شي، او ينفذوا التقنية، و لو في تكنولوجيا مفيش تي اس بي فيها مثلا او البارتنر فيها قوي ، مايكروسوفت بتستعين بتلبارتنر ده مباشرة فيها… .

حوووار مش كده… يا ترى بقا انت كنت مفكر الدنيا تكنولوبيا بس و لا ايه..#الايتي_مش_اكستشينج

ازاي تعمل ديزاين – الجزء الاول – اول مهارتين لازم تتعلمهم…

ازاي تعمل ديزاين – الجزء الاول – اول مهارتين لازم تتعلمهم…

هو ايه الديزاين ، يعني ايه تصميم انفراستراكشر او حتى سوفتوير ، ده اللي حنتكلم في الفترة الجاية ، اتكلمنا كتير حاجات مش تيكنكيال بقالنا شهرين تقريبا ، نخش شوية حتة تيكنكيال بس مش اوي.

لو انت قاعد في مدرجات السيلز و البريسيلز و الماركتنج ، ده حيكون مفيد لانه في كتير من الاحيان حتضطر تخش في موضوع الديزاين اما بتوجيه الناس التيكنيكال اللي معاك او تشتغل بأيدك لو بريسيلز طبعا

لو انت قاعد في مدرجات العملاء ، ده حيفيدك جدا في ازاي تحلل اي مشروع حيجيلك و تحط ليه تصميم.

علشان اوضح بس ، انا مش حتكلم عن ديزاين لحاجة معينة ، انا حتكلم في ايه الخطوات و الفريم ورك اللي تتبعه لأي ديزاين سواء سوفتوير او هاردوير ، اسف ان كنت خيبت امال البعض ، بس صدقني الكلام ده اهم…

==========================================

عارف انا الاحساس ده ، النهاردة انت اول يوم ليك و رايح لعميل علشان تشوف هو محتاج ايه و حتعمل ليه تصميم ، او حتى انت خبير بس رايح لديكهو المشروع المعقد ، او حضرتك نادالك المدير و في مشروع جديد حيبتدي و انتي مش عارفة تعملي ايه.

و اول ما تقعد في الكرسي تسمع: حضرتك يا باشمهندس حنعمل الهس بس في الدريبس علشان عمود الكرانك بيلء

 حتعملوا ايه حضرتك …

عمود الكرانك…العمووووود…

انا قعدت القعدة دي مليون مرة قبل كده ، حتعمل ايه…

بس ايه الموضوع.

من حوالي اسبوعين حطيت مسابقة هنا

لطرح تصميم لمشروع ما ، السيناريو تيكنيكال و تقيل ، بس السيناريو كان مليان الغام ، و قعدت 3 ايام اكتب فيه بطريقة معينة جدا ، الطريقة دي توحيلك انه كل حاجة واضحة ، بس اساسا مفيش حاجة واضحة…

لو قريت السيناريو ، ممكن تبتدي تحط الديزاين بتاعك و تكون وقعت في الفخ، و ده اللي حصل مع ناس كتير ، و هنا جالي نوعين من الفيدباك

  • اما ناس ابتدت تحط تصميم فورا
  • او ناس بتسأل ازاي نحط التصميم مش فنيا ، بس مش عارفين يبتدوا من فين.

و هنا برزت المشكلة ، مهارة التصميم غايبة او ضعيفة عند قطاع واسع ، لذا حان الوقت اننا نسيبنا من التكنولوجي ، و نتكلم في ازاي نستخدم مهاراتنا و مخنا لتوظيف التكنولوجي…

اما ابتديت اكتب المقال بصراحة قعدت افكر و عايز ابتدي من حتة ، الحتة دي انا مش عارفها ، انا بعمل ديزاينز بقالي 11 سنة ، نسيت حتى انا اتعلمت ازاي الموضوع ده ، بعمله تلقائيا و بدون تفكير ، بس ازاي اوصل المهارات دي…

فكرت و قسمت المهارات دي لكذا مستوى ، النهاردة حنتكلم على اهم اتنين من وجهة نظري….

بس الاول حتبتدي من فين.

غالبا حتبتدي من اجتماع مع مع العميل ، و اما بتكلم عن عميل ممكن يكون عميل مبشار او مديرك او ادارة تانية مثلا ، حتعمل معاهم ميتينج ناس كتير سموه باسامي اكتر

Requirements gathering

Kick off

اي حاجة

بس انت في الاجتماع ده حتكون مهمتك فهم احتياجات العميل ، الهدف انه تعرف اكتر ما يمكنك معرفته عن المشروع ، او المطلوب تنفيذه. و هنا لازم تتميز بالمهارات التالية:

اول مهارة لازم تتعلمها انه مفيش ديزاين غلط و انه مفيش حل واحد لأي مشكلة ، اي مشكلة ليها اكتر من حل، طالما التصميم بتاعك مش بيعمل حاجة مش سبورتد ، يبقا انت ديزانك فاليد ، حنشوف قودام انه في ديزان صح و في ديزاين اصح ، بس كله صحيح ، طالما بيمشي على القواعد العامة و بيوفر اكبر قيمة بأقل سعر و سبورتد (كل ده طبعا من وجهة نظرك).

انا بروح اماكن كتير و بعرض حلول ، يجي العميل يقوللي بس ممكن نعمل كده او كده ، في الحالة دي بطرح مش قال من 3 او 4 تصاميم مختلفة ، مش تعجيز بس لابراز النقطة ، طالما الديزاين سبورتد يبقا وارد ، احنا بنحاول كلنا نوصل للديزاين الافضل ، و الافضل دي حتفضل نسبية طول عمرها ، انت حتشوف حاجة و انا حشوف حاجة.

ليه دي مهارة مش مبدأ ، لانه المهارة دي حتخليك تفكر في ابعاد مختلفة ، طبعا حترجع لمواضيع الابداع و نظمه ، علشان تقدر لافكار جديده ، بس بقابل ناس كتير بتبقا رابطة دايما التصميم او الديزاين بفكرة او اتنين ، مفيش حاجة اسمها كده ، كل الافاق مفتوحة…

المهارة التانية، اسئل ، اسئل ، اسئل….

اهم نقطة كنت عايز اوصلها من خلال طرح السيناريو انه في الغالب ، حيجيلك المشروع او التاسك مش مفهومة ، عليك انك متتكسفشي و اسأل ، انا بسأل كتير جدا ، بسأل في كل حاجة انا عايز اعرفها.

ناس كتير بتتكسف و تخاف تسأل ، في مرحلة التصميم متخافشي انت مش عارف و من حقك تسأل ، بس لو حطيت تصميم غلط ، ساعتها لازم تخاف.

السؤال ليه فوائد عديدة للكل ، اوالا حيكشف كل الخبايا اللي ورا التاسك او المشروع ، او على الاقل حيطلع انه في تفاصيل اكتر لازم تتعرف و لو ملهاش اجابة ممكن تاخدها في قعدة تانية او تستفسر عليها بعدين.

سؤال العميل بيعمل حاجة تانية و هي ال Self-Actualization يعني العميل بيتعرف على احتياجاته و دي مشكلة كبيرة ، في كتير من العملاء او المديرين بيبقا عندهم تصور معين لاحتياجاتهم ، بس التصور ده ممكن ميكونشي دقيق او مكتمل ، او ممكن باضافة اسئلة بيكتشف انه ليه احتياجات تانية لازم انت تاخدها في عين الاعتبار ، يعني مثلا بسؤال العميل ممكن تكتشف انه معندوش لايسنس مثلا او ستوريدج كفاية او مفيش هاردوير ، او يكتشف انه توصيل الهاردوير حياخد وقت و هكذا.

و انت بتسأل ، لازم تتحلى بالتالي:

  • قدرتك على سؤال كل انواع الاسئلة (ايه و فين و امتا و مين و ازاي و فوق و تحت و يمين و شمال) و انك في التو و اللحظة تقدر تعرف ايه السؤال التاني و تبني خريطة للاسئلة في دماغك ، طبعا مع الوقت حتعرف انت محتاج تسأل ايه ، و لو معرفتش مفيش مشكلة وضح انه انت ممكن ترجع و تسأل تاني ، امشي روح و رتب ورقك و ارجع بنوبة هيستيرية من الاسئلة تاني.
  • قدرتك على انه تقول (ايه سبب كده) و (ليه حتعمل كده) ( و هل لازم نعمل كده) فهمك التلاتة دول بالذات حيوضحولك عوامل جانبية غالبا حتكون ادارية او نظامية ، حتأثر على تصميمك بشكل ممكن يخليك تعدل فيه او تاخد احتياطك من الاسباب دي. و اخر سؤال حيخليك تتحدى القيود اللي العميل حاطيطها في دماغه و ممكن تكتشف افاق اخرى بالاسلوب ده
  • لازم تطور انه تقول لاء ، و انه تقول لاء لازم طبعا يتم باسلوب غير مباشر و مهذب ، بس ساعات بتتطلب اشياء غير منطقية ، انك تحدد للعميل او مديرك ايه اللي ممكن تعمله و ايه اللي مش حنفع تعمله و اسبابه ، من اهم اسباب النجاح بعد كده…
  • بعد ما تكون صورة واضحة ، قول للعميل الصورة الواضحة دي مرة واحدة ، استعمل وايت بورد و ارسم على الورق و شخبط زي ما انت عايز ، استعمل كل الادوات المتاحة علشان تراجع فهمك للعميل ، ساعات كتير بيبقا في فرق كتير بين فهمك و فهم العميل رغم انه تمت الاجابة واضحة بس التصور مختلف ، عادي ، علشان كده لازم تشارك التصور النهائي و تتأكد منه ، و في الاخر تبعته بصورة مبدئية علشان توثقه.

طب حتسأل ايه ، هنا ده بيعتمد على مهاراتك التقنية و فهمك للمشروع اللي انت رايح فيه ، يعني اكيد في دليل ما قبل ما تروح , اكيد حيكون ليك خبرة او معرفة قبل كده ، و هنا بتبرز مهاراتك الفنية و فهمك و تعمقك في الموضوع ، و بناء على كده حيكون في اسئلة فنية و ادارية انت عارف انه حتسألها ( يعني مثلا كم عدد اليوزرز ، ايه حجم الداتا ، مين المسؤول عن الحتة الفلانية ، ايه قواعد السيكوريتي عندكم ) و هكذا و ده معناه انه لازم تكون مجهز في دماغك حاجات انت عارف انك حتسألها في كل برودكت انت بتشتغل بيه…

في حتة ناقصة ، ربط العلاقات بين السيستمز و بعضها ، يعني لو عندك اكتر من سيستم مع بعض شغالين ، تعمل ايه ، خليها بعدين ، مش دلوقتي

احنا لسه بنخطي ، عارف انه لسه في كتير لسه ، اتقل تاخد حاجة نضيفة…

للجزء الثاني…………….

ازاي تعمل ديزاين – مقدمة – الرضاعة و التكنولوجيا و الصراصير

ازاي تعمل ديزاين – مقدمة – الرضاعة و التكنولوجيا و الصراصير

صباح الخير ، نشاط ، حيوية ، هوب هوب.

زي ما وعدت الاسبوع اللي فات ان شاء الله حنبتدي الاسبوع  ده في موضوع ازاي تعمل ديزاين او تصميم ، حنمر بحاجات كتير منها عمليات عقلية ، ايه المراحل المختلفة ، و ايه متطلبات الدوكيومنتيشن المطلوبة ، بس قبل ما نبتدي ، لازم اوضح حاجة.

انا سألت الاسبوع اللي فات عايزين تقروا او تسمعوا ايه ، و فيه فيد باك طيب جالي اما في كومنتات او على الخاص ، و كان في نقطة واضحة هي اختلاف تصوري عن تصوركم.

وجهة نظري ،- المتواضعة – و ليك حق تقبلها او لاء ، انه على مدار السنوات اللي فاتت نشأنا و كبرنا و احترفنا رضاعة التكنولوجيا و شجعتنا على ذلك مختلف الاتجاهات و الشركات (و لا استثني نفسي) يعني الكل بقا يحب يتكلم في التكنولوجيا ، و يرفض انه يبعد عنها ، زي الاطفال في الرضاعة ، محدش عارف يتفطم الا من رحم ربي ، لانه دي منطقة مريحة لينا…

عارفين نتكلم فيها ، و محدش بيفهمنا اما بنتكلم فيها (يعني سهل جدا تقف قودام اي حد و تقوله السيرفس باك للراوتر محتاجة رول على الفاير ول علشان الاس ام تي بي و التي سي بي) اي كلام و محدش حيفهم حاجة.

و ساعدتنا الشركات على ادمان اللبن ده ، بتغذيتنا بكل مصادر التكنولوجيا من كتب و فيديوهات و مؤتمرات و غيره.

بس هل التكنولوجيا دي حتساعدك….

طب انت عايز ايه يا محمود؟!

وجهة نظري ، انه مهما شرحنا من تكنولوجيا ، مش حنقدر نحقق حاجة ملموسة ، لانه البيزنس بيتغير ، بيتغير اسرع من التكنولوجيا و بالتالي التكنولوجيا بتطور علشان تواكب احتياجات البيزنس ، بس احنا مرتبطين قوي بالتكنولوجيا ، و لاننا متعمقين فيها ، بتتغير و بنتعب احنا…

مهما شرحت من تكنولوجيا ، حتنهار ، قوانين الدنيا بتقول كده ، قوانين الدنيا بتقول انه 70% من التكنولوجيا اللي بنستعملها الان حتتغير كمان 3 سنين ، و 50% من التكنولوجيا حتنتهي كمان 5 ل 7 سنين ، مهما شرحنا ، حتمشي التكنولوجيا..

بس حيفضل المبدأ ، و اللي محدش بيشرحها ، في ناس كتير بتشرح اكستشينج و سيسكو و غيره ، بس ايه العمليات الفنية و الذهنية المطلوبة علشان نحط  تصميم صح ، محدش ، بس  عشر سنين و النهاردة و بعد 20 سنة ، حتفضل المبادئ هي هي  و غالبا الفيديوهات دي حيكون مالهاش لازمة.

مهما درست من تكنولوجيا حتيجي حاجة جديدة ، و لو معندكشي القدرة او المبدادئ الاساسية ، حتقع ، و افتكر هنا اخونا هوجو بوص  بتاع الكالونيا و هو بيقول (ده اللي بيفصل الرجالة عن العيال)…

اديك شوية امثلة:

  • كنت بشتغل في مشروع Forefront Identity Manager 2010 لبنك كبير ، الفيم بالنسبة لي سهل ، اشتغلته كتير ، بس التحدي انه البنك عايز يعمل انتجريشن مع 75 سيستم و ابليكيشن جوا البنك ، استحالة مهما قريت من تكنولوجيا ، انه افهم كل ال 75 سيستم قبل ما اخش المشروع ده ، بس لو عندي الاسس و العمليات العقلية و الفنية الصحيحة ، حقدر اتعامل مع المشروع و ابحر وسط عواصف التغيير بسلام ، و قد كان.

  • جالي مشروع بيتم فيه لمراقبة الجراجات و بوابات الدخول بسكانرز عالية الدقة تعتمد على عمل سكان و مقارنة الصور ، الابليكيشن ويندوز و بيخزن الداتا في فايل شير عادي و بيعتمد على الاي بي و بيتعامل مع الاكتيف دايكتوري و غيرها من الانظمة الداخلية و مع سيستمز اخرى للحسابات و ادارة الفنادق و و و …قوللي بقا مهما ذاكرت ، هل حتعرف و او حنعرف نتخيل انه ممكن يجي مشروع زي ده…

ده اللي بيفصل الرجالة عن العيال….

طب انا عايز ايه ، هممممم ، عايز افكار صرصارية ، عايز المبادئ دي تفضل حتى لو انضربنا بالنووي…

الصراصير ، هي الكائنات الوحيدة اللي بتفضل عايشة بعد ضرب مكان ما بالقنبلة النووية ، انا عايز احط اسس كالصراصير ، تفضل و تبقى حتى بعد النووي….

بفتكر العظيم توم شيندر مؤسس isaserver.org في محاضرة ليه من حوالي سنتين في تيك اد كان بيتكلم عن تعريف الكلاود ، كنت عايز اركب الطيارة و اروح ابوسه (في بوقه) اما شوفت المحاضرة دي ، انا قولت انها اهم محاضرة ل 2012

لانه الكلاود متغيرة و التقنيات متغيرة و احنا كناس تقنيين بنحب اوي نتكلم في مايكروسوفت عملت الاكبر و في ام وير عملت الاسرع ( و الشركات بتشجع الحوار ده)، بس محدش عارف ايه اسس الكلاود ، الاسس اللي حتفضل على مدار السنين متتغيرشي مهما تغيرت التكنولوجيا ، و دي الحاجات اللي الي كان بيتكلم فيها.

عايز تفهم انا عايز اعمل ايه…

انا ممكن اشرح تكنولوجيا ، دي احلى حتى ، بس انا حعمل الصح ، حسمع كلام استاذ غسان مطر ، و اعمل الصح…

حساعد انه احط الاسس ، احدد الفريم ورك ، اظبط النظام ، و لو ده تم ، حكون اسعد انسان في الدنيا.

انا عايز اغير النظام ، اتكلم في الكلام الصعب ، اغير التفكير ، احط الاسس ، اعمل موجة جديدة ، ابتدت تبان.

في صفحات و بيدجز كتيرة ابتدت تتكلم عن النجاح و التفاؤل ، اصحابي كتير ابتدوا ياخدوا نفس خطي ، وده ميضايقنيش ، ده اللي انا عايزه ، اننا نتغير ، بعيدا عن دوائر الهبل السياسي و الفتش المجتمعي اللي عايشين فيه.

انا اسف ان كنت خيبت او حخيب امل البعض ، انا متفهم ده تماما ، بس انا عايز افطمك و انا كمان معاك، و عايز علمي اللي بكتبه  ، يكون صرصار ، ينضرب بالنووي ولا يتهزش.

اه ، دي مقدمة ، الجزء الاول كمان ساعتين…………..